Azərbaycanda əhalinin evə olan ehtiyacının öyrənilməsi üçün sorğu keçiriləcək

Azərbaycanda əhalinin yaşayış sahələri ilə təminatlılıq səviyyəsinin və ehtiyacının qiymətləndirilməsi, yaşayış şəraitinin yaxşılaşdırılması üsullarının müəyyən olunmasına dair ictimai sorğu keçiriləcək.
Marja.az xəbər verir ki, sorğu İpoteka və kredit Zəmanəti Fondunun sifarişi ilə "LİDER PROPERTY" MMC şirkəti tərəfindən keçiriləcək.
Fond şirkət ilə məbləği 24.900 manatdır. Sorğu 17 fevral 2024-cü il tarixinədək başa çatmalıdır. 
Sorğunun keçirilməsinin məqsədi - əhalinin yaşayış sahələri ilə təminatlılıq səviyyəsinin, yaşayış sahələrinin və müvafiq maliyyə alətlərinin əlçatanlığının və əhalinin ehtiyaclarına uyğunluğunun qiymətləndirilməsi, yaşayış sahələrinə dair tələbin kəmiyyət və keyfiyyət göstəricilərinin, habelə yaşayış sahələrinin yaxşılaşdırılması ilə bağlı məhdudiyyətlərin araşdırılmasıdır.
İctimai sorğunun keçirilməsi zamanı proporsionallığın təmin edilməsi və sorğuların ölkənin bütün ərazilərini əhatə etməsi üçün, ev təsərrüfatlarının seçimində "klaster" seçimi metodundan istifadə edilməsi nəzərdə tutulur. Metoda əsasən sorğu keçirilən şəhərlər müəyyən ərazilərə (klasterlərə) bölünməli və klaster kimi bir seçki dairəsi götürülməlidir. 
Böyük şəhərlərdə bir klasterdə 15 müsahibə, kiçik şəhərlərdə isə 10 müsahibə keçirilməli və hər bir klasterdə isə təsadüfi addım seçimi metodologiyasından istifadə olunmalıdır.
Sorğu  Bakı, Gəncə, Quba, Lənkəran, Mingəçevir, Yevlax, Şəki, Şirvan, Sumqayıt və Xırdalanda ən azı 3000 ev təsərrüfatı arasında keçirilməlidir: 
Sorğu – respondentlər tərəfindən təqdim edilən anketin suallarının cavablanlandırılması metodu ilə aparılmalıdır.