Sumqayıt və Lənkəranda güzəştli şərtlərlə satılmış mənzillərin seçimi dekabrın 14-dək aparılacaq
Bu gün Sumqayıt və Lənkəran şəhərlərində güzəştli şərtlərlə satılmış 544 mənzil üzrə gözləmə qaydasında mənzil seçimi dekabrın 10-dan 14-dək həyata keçiriləcək.
Bunu Mənzil İnşaatı Dövlət Agentliyinin (MİDA) Beynəlxalq Əlaqələr və Strateji Planlaşdırma Şöbəsinin müdiri Cəmşid Əmirov jurnalistlərə açıqlamasında deyib.
Təcili xəbərlər üçün bizi WhatsApp kanalından izlə
"Vətəndaşlar seçilmiş mənzili gözləmə qaydasında seçə bilərlər. Əgər ilkin seçim edən şəxs mənzili əldə etməzsə, bu mənzil növbəti vətəndaşa təklif ediləcək. Sistem tam şəffaf işləyir və indiyə qədər hər hansı problem müşahidə olunmayıb", – C. Əmirov qeyd edib.
Onun sözlərinə görə, bu satışda əlavə təhlükəsizlik tədbirləri tətbiq olunub: "Bunun əsas məqsədi mənzil seçiminin qanunsuz sürətləndirilməsinin qarşısını almaqdır. Prosesin təhlükəsizliyini təmin etmək üçün xüsusi tədbirlər görmüşük və sistemdə hər hansı müdaxilənin qarşısı tamamilə alınıb".
C. Əmirov xatırladıb ki, Sumqayıt Yaşayış Kompleksində 392 mənzil və Lənkəran Yaşayış Kompleksində 152 mənzil olmaqla, ümumilikdə 544 mənzilin satışına saat 11:00-da başlanılıb:
"Bu gün satışa çıxarılan mənzillər qısa müddət ərzində vətəndaşlar tərəfindən seçildi. Əksər hallarda mənzil sifarişi uğurla tamamlandı. Agentliyin fəaliyyəti dövründə ümumilikdə bu günə qədər 16 satış həyata keçirilib. Güzəştli mənzil sistemində isə 38 mindən çox vətəndaş qeydiyyatdan keçərək elektron kabinet əldə edib. Bu satışda da vətəndaşların aktiv iştirakı bizi sevindirdi". / banker.az
