"Nort Vest Konstrakşn" şirkətinin gəliri və xalis mənfəəti kəskin artıb
"Nort Vest Konstrakşn" MMC 2023-cü ili 32 milyon 729 min manat xalis mənfəət ilə başa vurub. Şirkət 2022-ci ili 8 milyon 868 min manat xalis mənfəət ilə bağlamışdı. Beləliklə, 2022-ci illə müqayisədə 2023-cü ildə "Nort Vest Konstrakşn" şirkətinin xalis mənfəət 3,7 dəfə artıb. Xalis mənfəətin artması gəlirin artmasından qaynaqlanıb.
Marja.az xəbər verir ki, "Nort Vest Konstrakşn" MMC-nin əsas əməliyyat gəlirləri 2022-ci ildə 272 milyon 510 min manat ikən, 2023-cü ildə 415 milyon 988 min manata yüksəlib (143 milyon 478 min manat və ya 1,5 dəfə artıb).
Ötən il "Nort Vest Konstrakşn" MMC 40 milyon 911 min manat vergidən əvvəlki mənfəətindən 8 milyon 182 min manat mənfəət vergisi ödəyib.
31 dekabr 2023-cü l tarixində "Nort Vest Konstrakşn" MMC 169 milyon 46 min manat cəmi aktivlərə malik olub. Şirkət 2023-cü ilin sonunda 351 milyon 338 min manat cəmi aktivlərə çalik idi.
"Nort Vest Konstrakşn" şirkətinin fəaliyyəti sənaye obyektlərinin, çoxfunksiyalı bina və komplekslərin, yolların, körpülərin, tunellərin və digər nəqliyyat infrastruktur sistemlərinin, su təchizatı və kanalizasiya sistemlərinin, enerji layihələrinin tikintisi və layihələndirilməsini əhatə edir. NW həmçinin layihənin idarə edilməsi xidmətlərini göstərir.
