Naxçıvanda hərrac vasitəsilə 6 torpaq sahəsi mülkiyyətə, 5 torpaq sahəsi icarəyə verilib
Avqustun 20-də Naxçıvan Muxtar Respublikasının İqtisadiyyat Nazirliyi yanında Əmlak Məsələləri Dövlət Xidmətinin tabeliyində "Hərracların Təşkili Mərkəzi" publik hüquqi şəxs tərəfindən torpaq sahələrinin mülkiyyətə və icarəyə verilməsi ilə bağlı növbəti hərrac keçirilib.
VTB-də minimal faiz dərəcəsi ilə nağd kredit 10.49%-dən
Xİdmətin yaydığı məlumatda bildirilir ki, hərracda qeydiyyatdan keçmiş 22 sifarişçi muxtar respublikanın 9 bələdiyyəsinə məxsus 6 torpaq sahəsinin mülkiyyətə, 5 torpaq sahəsinin isə icarəyə verilməsi üzrə rəqabətin iştirakçısı olub.
Bildirilib ki, sahibkarlıq fəaliyyəti üçün hərraca çıxarılan torpaq sahələrinin ilkin satış və icarə qiymətləri müvafiq ərazilər üzrə torpaq sahələrinin bazar qiyməti nəzərə alınmaqla müəyyənləşdirilib. Şəffaflığın təmin edilməsi məqsədilə hərracın videoçəkilişi aparılıb.
Xatırladılıb ki, cari ilin yanvar-iyul aylarında Naxçıvan Muxtar Respublikasında hərrac yolu ilə satılan əmlakların sayı ötən ilin eyni dövrü ilə müqayisədə 2,3 dəfə artaraq 70-ə çatıb. Ötən 7 ayda keçirilən hərraclardan xüsusi hesaba daxilolmalar 2023-cü ilin müvafiq dövrü ilə müqayisədə 3,6 dəfə artıb.
Keçirilən hərrac və müsabiqələrlə bağlı ətraflı məlumatı Naxçıvan Muxtar Respublikasının İqtisadiyyat Nazirliyi yanında Əmlak Məsələləri Dövlət Xidmətinin emlak.nakhchivan.az rəsmi internet saytından əldə etmək mümkündür.
/ marja.az
