Tikinti şirkəti əvvəlki kimi gəlir əldə edə bilmir – Bu arada səhmdarlardan biri isə kapitalını geri çəkir
Azərbaycanda fəaliyyətdə olan inşaat şirkəti "AS İnşaat-N" MMC-nin 2022-ci ildə xalis mənfəəti azalıb.
Banker.az xəbər verir ki, şirkətin əsas əməliyyat gəliri 2021-ci ildə 1 mln. 944.5 min manat olduğu halda, bu rəqəm 2022-ci ildə 4% artaraq 2 mln. 72.8 min manata yüksəlib. Lakin artım olsa belə, bu, öncəki illərdən xeyli aşağıdır.
Şirkətin əsas əməliyyat gəlirləri asfaltdan tutmuş betona qədər inşaat məhsullarının istehsalından əldə edilir. Sözügedən şirkət yaşayış və qeyri-yaşayış binalarının tikintisini həyata keçirir.
Şirkət 2020-ci ilə qədər 9-10 mln. manatlıq gəlirlərə sahib idi. Son iki ildə isə şirkətin gəlirlərində kəskin eniş oldu. 2019-cu ildə "AS İnşaat -N" MMC 29 mln. 858.4 min manatlıq gəlir əldə etmişdi ki, bu göstərici 2020-ci ildə 11 mln. 707 min manata, 2021-ci ildə isə kəskin enişlə 1 mln. 944.5 min manata düşdü.
Ötən gün isə şirkətin həmtəsisçilərindən biri "Crystal Əmlak" ASC-nin (Crystal şirkətlər qrupuna daxildir) bu şirkətdəki 50%-lik payını geri çəkdiyi məlum olub. Şirkətin digər həmtəsisçisi iş adamı Nuşravan Cəlilovdur, hansı ki, o həm də şirkəti idarə edir. Beləliklə, pay bölgüsündə hansısa dəyişiklik bundan sonra olmazsa, cənab Cəlilov şirkətin əsas səhmdarı kimi qalacaq.
Şirkət 2022-ci ildə 22 min manat xalis mənfəət əldə edib. 2019-ci ildə bu xalis mənfəət 1 mln. 989.5 min manat, 2020-ci ildə 557.5 min manat və 2021-ci il isə 378.7 min manat olub.
Bununla belə, şirkət son ildə səhmdarlarına dividend ayırmayıb. 2022-ci ilin sonuna onun kapital balansında 2 mln. 831.5 min manat bölüşdürülməmiş mənfəət var.
Xatırladaq ki, şirkət 2010-cu ildə təsis edilib. Ötən gün elan verildiyi kimi, "Crystal Əmlak" QSC şirkətdən əmlakını çəkərsə, nizamnamə kapitalı 100 manatdan 50 manata düşəcək. Beləliklə, şirkətin yeganə səhmdarı Nuşravan Cəlilov olacaq.
