Saray qəsəbəsində vətəndaşlara satmaq öhdəliyi ilə yeni kirayə mənzillər təklif olunacaq

Yaxın vaxtlarda İpoteka və Kredit Zəmanət Fondu Abşeron rayonunun Saray qəsəbəsində vətəndaşlara satmaq öhdəliyi ilə yeni kirayə mənzillər təklif edəcək.
Bunu Fondun Kirayə mənzil departamentinin direktor müavini Aslan Zeynalov bildirib.
Təcili xəbərlər üçün bizi WhatsApp kanalından izlə
"Mayın 23-də Saray qəsəbəsinin Məhəmməd Əsədov küçəsində təqdim etdiyimiz 328 tam təmirli mənzili 10 gün ərzində vətəndaşlarımız seçdi və rəsmiləşdirmə yekunlaşmaq üzrədir. Vətəndaşların çoxsaylı müraciətlərini nəzərə alaraq həmin ərazidə yeni mənzillərin kirayə mexanizmi çərçivəsində təklif edilməsi nəzərdə tutulur", – deyə o qeyd edib.
"Kirayə mənzil fondu formalaşdırılarkən vətəndaşların istək və tələbləri nəzərə alınır. İnsanlar Bakı və Sumqayıt şəhərlərində, həmçinin Abşeron rayonunda yerləşən mənzillərə üstünlük verir. Layihənin icrasına başlanıldığı 2020-ci ildən bəri 13 fərqli ünvanda yaşayış sahələri alınaraq vətəndaşlara təklif edilib. Bakıda 6 fərqli ünvanda, Sumqayıtda 2 ünvanda və Abşeron rayonunun bir sıra yaşayış məntəqələrində – Xırdalan şəhəri, Masazır və Saray qəsəbələrində yaşayış sahələri kirayə mənzil fonduna daxil edilib", – deyə Fond rəsmisi əlavə edib. / banker.az